БИШКЕК, 21-авг. — Sputnik. Бала үч айга созулган эс алуудан кийин жаңы окуу жылына тез көнүп кетүүсү үчүн ата-эне анын маанайын ар тараптан көтөрүп туруусу керек. Бул тууралуу россиялык психолог, "Балдардын психологиялык-педагогикалык көйгөйлөрү" институтунун директору Татьяна Волосовец РИА Новости агенттигине айтып берди.
Адистин пикиринде ата-энелер төмөндөгү сунуштарды эсине түйүп алса ашыкча болбойт:
— Жайкы каникул учурунда бала кечирээк жатып, кеч турары белгилүү. Андыктан август айынын ортосунан тарта акырындык менен "окуу режимине" өткөрүү керек. Тагыраагы, эрте жаткырып, эрте ойгото баштаңыз;
— Каникул учурунда барган кызыктуу жерлер, окуялар тууралуу кайрадан эсине салып, бул жөнүндө классташтарына, мугалимине айтып бериши керектигин айтыңыз. Жагымдуу сезимдер менен бөлүшкүсү келген бала дароо мектептеги досторун көрүүгө ашыга баштайт;
— Эгер жай бою балаңыз китеп окубаса, эми оку деп кыйнабаңыз. Акыркы бир жумада бала бир нерсени окуп кыйратып ийбейт. Тескерисинче, окуу башталбай жатып, китептен көңүлү калат;
— Акырында адис жаңы окуу жылынын алдында баланы чоңдордун арасындагы ар кандай көйгөй, пикир келишпестиктерге аралаштырбай эле коюуну сунуштайт. Анын айтымында, бала үйдө болуп жаткан ар бир негативди жүрөгүнөн өткөрүп, терең маани берет. Мындай учурда баланы ой басып, жаңы сабактарды кунт коюп окууга тоскоолдук жаралат.
Окуу жылы демекчи, быйыл 1-сентябрь күнү Кыргызстандын бардык аймактарындагы коомдук транспорттор окуучуларды мектепке бекер ташыйт.