БИШКЕК, 17-авг. — Sputnik. 2005-жылдан бери тышкы карызды төлөөгө республикалык бюджеттен 146,3 миллиард сом кеткен. Бул туурасында Финансы министрлигинен кабарлашты.
Кыргызстандын тышкы карызы 4, 4 миллиард доллар, аны төлөөгө жылына ондогон миллиард сомдор жумшалат. Маселен, ушул жылдын эле биринчи жарымында мамлекеттик карыздан кутулууга 13,3 миллиард сом сарпталган.
Миллиарддаган бул акчалар 386 миллион доллар кетти деген ТЭЦтей дагы беш борборду модернизациялоого жетмек. Азыркы курс (сомдун долларга болгон катышы) менен алганда бул сумма көп чыгышы мүмкүн, ал эми модернизациянын акчалары мурдагы 69,5 сомдон төмөн баа менен эсептелди.
Бул каражат Түндүк менен Түштүктү (азыркы долбоордун наркы — 840 миллион доллар) байланыштырган эки трассаны салууга кенен жетмек. Ал эми калганына, мисалы ТЭЦти жаңылап коюуга болот эле.
Мындай суммадагы акча Жогорку Нарындагы ГЭСтер каскадынан экини салууга жетет эле. "РусГидронун" баасы боюнча долбоор 727 миллион доллар турган. Ал эми жетпей калган 77 миллионду насыя менен чечсе болмок.
Буга чейин Sputnik Кыргызстан Кыргызстандын Кытайга болгон карызы 10 жыл ичинде 200 эсе өскөндүгүн эсептеп чыккан.