БИШКЕК, 13-авг. — Sputnik. Гранттык жана жана техникалык жардамдарды аймактарга буруу абдан зарыл. Бул туурасында премьер-министр Мухаммедкалый Абылгазиев Кыргызстанды туруктуу өнүктүрүү боюнча Улуттук кеңештин жыйынында билдиргенин маалымат кызматы кабарлады.
Өкмөт башчы аймактарга Doing Business рейтингинин улуттук аналогун киргизүү иштерин баштоо зарылдыгын да белгилеген.
"Ошондой эле жергиликтүү өз алдынча башкаруу органдары тарабынан ар бир регион боюнча уруксат кагаздары, жер маселелери, инфратүзүмгө кошулуу, жеңилдиктерди камтыган инвестициялык лотторду даярдоо зарыл. Ошону менен бирге буга чейин өзүн жакшы көрсөтө алган "Бир айыл — бир продукт" долбоорун республиканын бүт аймактарына жайылтабыз", — деди Абылгазиев.
Бул долбоор JIKAнын (Япония Эл аралык кызматташтык уюмунун) колдоосу менен ишке ашырылып келет. "Бир айыл — бир продукт" JIKA дүйнөнүн ар түрдүү өлкөлөрүндө ишке ашырып жаткан ийгиликтүү долбоорлордун бири.