БИШКЕК, 10-авг. — Sputnik. Бишкектеги Исанов көчөсүндөгү жарылуудан россиялык бизнесмен Александр Гайдуков жабыркады. Бул тууралуу Sputnik Кыргызстан агенттигине милициядагы ишенимдүү булак кабарлады.
Бул ишкерге бүгүн жарылуу болгон жерде 2016-жылы да ок атылган болчу. Ал иштин бети ачылган эмес. Бүгүн анын унаасынын жанында жарылуу болду. Гайдуков тирүү калды, абалы канааттандырарлык.
Ачык булактардагы маалыматтарга караганда, ишкер 1961-жылы Санкт-Петербургда төрөлгөн. Ал Авиациялык институтту аяктаган. Расмий түрдөгү биринчи иши "Азимут" аттуу илимий-өндүрүштүк бирикме болуп саналат. Кийин Гайдуков Минскиде СССРдин Улуттук коопсуздук комитетинин жогорку курсунан өткөн. Күч түзүмдөрүндө 1991-жылга чейин эмгектенген.
ЖМКлардагы маалыматтарда Гайдуков 1988-жылдан тарта Кыргызстанга байма-бай каттай баштаганы айтылат.
Александр Гайдуков Кыргызстанда дагы ишкерлик менен алектенет Анын бул өлкөдө "НС информ консалтинг" аттуу консалтигдик фирмасы жана Кей супро" соода компаниясына ээлик кылат. Ошондой эле "Бишкек-Экспо" ЖЧКсынын негиздөөчүлөрүнүн бири. Компания Арстанбабдагы жаңгактардан май чыгарып иштейт. Ушул эле фирмага Тамара Сосновская жана Елена Хромова аттуу айымдар ээлик кылат.
Исанов көчөсүндө ушу тапта эмне болуп жатканын Sputnik Кыргызстан агенттиги жүргүзүп жаткан тексттик трансляциядан билсеңиз болот.