Дүйнө жүзү боюнча энелердин бир пайызынан такыр сүт чыкпайт. Бул аялдар табиятынан ушундай өзгөчөлүккө ээ. Бул тууралуу Сагынбү Абдувалиева Sputnik Кыргызстан радиосунун таңкы эфиринде маек куруп жатып билдирди.
Анын айтымында, сүтү бар туруп баласын эмизбей коюу ымыркайдын да, эненин да ден соолугуна зыян.
"Бала төрөлгөндөн кийин алгачкы күндөрүндө эненин сүтү абдан маанилүү. Кээ бир аялдар эчкинин, уйдун же башка сүт эненин сүтүндөй эле деп ойлоп, жаңылышат. Бала үчүн эненин сүтүнөн өтөр азык жок. Дүйнө жүзү боюнча болгону энелердин бир пайызынын гана сүтү такыр келбей калат. Калган аялдар төрөгөн соң баласын дароо эмизиши керек. Баланы эмизүү ымыркай үчүн эле эмес, апасынын да ден соолугуна пайдалуу", — деди Абдувалиева.
Ал кошумча тамак менен чоңойгон наристелерде кийин аллергия, семирип кетүү, кант диабети сыяктуу оорулар пайда болушу мүмкүндүгүн кошумчалады.