БИШКЕК, 3-авг. — Sputnik. Сузак райондук милициясы Барпы аймактык бөлүмүнүн имаратын мамлекеттик казынага оордугун салбастан ашар ыкмасы менен куруп жатат. Бул туурасында Жалал-Абад ОИИБдин маалымат кызматы кабарлады.
Билдирмеге караганда, учурда имараттын дубалы бүткөрүлүп, үстүнө ылай төшөө үчүн Сузак РИИБдин начальниги баш болгон өздүк курам келип, кол кабыш кылууда. Милиционерлердин жапа тырмак аракети астында курулушту күз мезгилине чейин бүтүрүү пландалууда.
Милиция бөлүмүн куруу үчүн жер тилкеси Сузак районунун Барпы айыл аймагынын Миң-Өрүк айылынан берилген. Имараттын аянты 402,75 чарчы метрди түзүп, 18 бөлмөдөн турат. Пайдаланууга берилгенден кийин 28 000 калкы бар аймакты тейлейт.