БИШКЕК, 1-авг. — Sputnik. Президенттик аппараттын алдында балдар үйлөрү системасын реформалоо боюнча эксперттик жумушчу топ түзүлдү. Бул тууралуу өлкө башчынын маалымат кызматынан билдиришти.
Аталган топтун негизги максаты — балдардын кызыкчылыктарын жана муктаждыктарын илгерилетүү, баланын үй-бүлөдө жашоо укугун коргоо боюнча мамлекеттик саясатты ишке ашыруу жана интернат мекемелерди оптималдаштыруу.
Эксперттер бул тармак боюнча иликтеп чыгып, тиешелүү сунуштарды 1-октябрга чейин өлкө башчынын кароосуна киргизүүсү зарыл.
Белгилей кетсек, 2018-жылдын 19-июлунда президент Сооронбай Жээнбековдун жарандык коомдун өкүлдөрү менен болгон жолугушуусунда "Баланын укуктарын коргоочулардын лигасы" коомдук фондусунун директору Назгүл Турдубекова үй-бүлөнү колдоо жана балдарды коргоо маселелерин көтөргөн.