БИШКЕК, 30-июл. — Sputnik. Кыргызстандык балбан Айсулуу Тыныбекова Түркияда өткөн Yasar Dogu — 2018 турниринде күмүш медалга ээ болгонун Бүткүл дүйнөлүк күрөш бирикмесинин расмий сайты жарыялады.
Жеңиши менен балбан Instagram баракчасынан да бөлүштү.
Мелдеш 27-29 июль күндөрү Түркиянын Стамбул шаарында өткөн. Анда өлкө атынан жалгыз Айсулуу Тыныбекова катышты.
Балбан мелдеште тунистик, германиялык, азербайжандык атаандаштарын утуп, финалда машыктыруучусу Нурбек Изабековдун кеңеши менен кармашуудан баш тарткан. Бул туурасында Sputnik Кыргызстан маалымат агенттигине Күрөш федерациясынын вице-президенти Байгазы Кенжебаев билдирди.
"Айсулуу алгачкы жолу 62 килограммда күч сынашты, буга чейин килемге 59 килограммда чыгып келгенин билесиздер. Салмак жакында Индонезияда өтө турчу Азия оюндарына байланыштуу алмаштырылды. Машыктыруучу штаб балбан кыздын күчүн ашыкча сарптабаш үчүн кармаштан баш тарттык. Анүстүнө Айсулуу менен чыга турчу кыздардын салмагы 2-3 килограмм оор болчу. Мелдеш уюштурган тарап балбандын салмагы эки килограммга чейин ашык болсо күрөшкөнгө уруксат берип жаткан. Жыйынтыгында автоматтык түрдө экинчи орунга ээ болдук", — деди Байгазиев.
Тыныбекова финалда болгариялык балбан Тайбе Юсейн менен кез келмек.
Жакында эле Айсулуу Тыныбекова Кытайдын Тайюань шаарында өткөн China Open эл аралык турниринде коло уткан болчу.