БИШКЕК, 30-июл. — Sputnik. Кыргызстанда жай башталгандан бери 1950-жылдары өткөн авиациялык окуулардан кийин калган 20дан ашуун авиабомба табылганын Генералдык штаб билдирди.
Снаряддардын баары Баткен облусунан табылган. Иликтөө иштери Ак-Турпак айыл аймагында (Жаңы-Жер, Миң-Чынар, Жаш-Тилек айылдары) жүрдү. Эки айдын ичинде саперлор 40 миң чарчы метрди текшерип чыгышкан. Натыйжада 20дан ашуун ФАБ-100 түрүндөгү авиабомба табылган.
Генералдык штаб бомбаларды издөө жана зыянсыздандыруу катуу ысыкта жүрүп жатканын белгиледи. Иштерди октябрдын соңу менен жыйынтыктоо пландалууда.