БИШКЕК, 30-июл. — Sputnik. Бишкек шаарынын мэрине талапкер болгондор 31-июлда саат 14:00дө кыргыз тилинен экзамен берерин Боршайкомдун маалымат кызматы билдирди.
Белгилей кетсек, калаа башчысын шайлоо 8-августка белгиленген. Азырынча ага шаардык кеңештеги көпчүлүк коалициядан Азиз Суракмактовдун гана талапкерлиги расмий көрсөтүлдү.
Бишкек шаардык аймактык шайлоо комиссиясынан билдиришкендей, шаар башчылыгына талапкер болгондордун документтери 31-июлда кечки саат 18:00гө чейин кабыл алынат.
"Кыргыз тилинен экзамен тапшыруу саат 14:00дө башталып, 18:00гө дейре болот. Эгер ошого чейин документтерин алып келгендер болсо дароо эле тил сынагынан өтүүгө жөнөтөбүз", — дешти комиссиядан.
Кыргыз тили боюнча экзамен тапшыруу Боршайкомдун имаратында өтөт.
Калаа башчылыгына интернет колдонуучулары дагы өз талапкерлерин көрсөтүп жатышат.