БИШКЕК, 29-июл. – Sputnik. Биринчи вице-премьер-министр Кубатбек Боронов кечээ Шаарды жылуулук менен күз-кыш мезгилинде камсыз кылуу, ага карата даярдыкты билүү максатында Бишкек ТЭЦине барды.
"Улуттук энергетикалык холдинг компаниясы" ААК башкармалыгынын төрагасы Азамат Абдыкадыров Бишкек шаарынын ЖЭБинде жүргүзүлүп жаткан оңдоо иштеринин жана капиталдык курулуштун жүрүшү тууралуу маалымдады.
"Бардык иштер графикке ылайык жүрүүдө. Аны менен бирге жабдууларды оңдоодон тышкары маанилүү маселе – химиялык суу тазалоо жаңы курулушунун мөөнөтү болуп эсептелет", — деди ал.
Боронов химиялык суу тазалоо жаңы цехинин курулушун 2018-жылдын 1-октябрына карата аяктоону тапшырды.
"2018-жылдын январында болгон авариянын кайталанышына жол бербөө максатында Бишкек ТЭЦтин жетекчилиги кытай компаниясы ишке ашырып жатканына карабастан, химиялык суу тазалоо жаңы цехинин курулуш иштерин аткаруунун жүрүшүнө мониторинг жасоосу зарыл", — деген Боронов.
"Алдыдагы жылуулук мезгилине толук жоопкерчилик менен мамиле кылуу керек. Даярдыктардын үзгүлтүккө учурашын тендерлердин кеч өткөрүлүшү, катышуучулардын жоктугу менен актоо кабыл алынбайт", — деген Биринчи вице-премьер-министр.