БИШКЕК, 26-июл. — Sputnik. Iraqi Airways авиакомпаниясынын эки учкучу абадагы самолеттун ичинен мушташа кеткени үчүн кызматтан алынды. Окуянын чоо-жайын өлкөнүн транспорт министрлиги териштирип жатканын РИА Новости агенттиги Al Sumaria телеканалына таянуу менен билдирди.
Ага ылайык, окуя бир нече күн мурун 11 чакырым бийиктикте болгон. Ошол учурда учактын ичинде 150 жүргүнчү бараткан. Учкучтарды коопсуздук кызматы арачалап калган. Алар кабинанын ичиндеги айрым тетиктерди талкалап салышкан. Жаңжал эмнеден улам чыкканы азырынча белгисиз.
Iraqi Airways окуянын чоо-жайы аныкталгандан кийин учкучтарга карата катуу чара көрүлөрүн, керек болсо ишинен өмүр бою четтетилиши ыктымалдыгын жазды.
Иликтөөнүн жыйынтыгы коомчулукка жарыяланат.