БИШКЕК, 22-июл. — Sputnik. 60 жаштагы австралиялык Робин Кэннер "Дүйнө сулуусу — 2018" сынагынын жеңүүчүсү аталды. Бул тууралуу иш-чаранын Fаcebook тармагындагы расмий баракчасында маалымдалган.
Бир нече жыл мурун Робиндин 22 жаштагы баласы рак илдетинен көз жумган. Бул каргашалуу окуядан кийин аял өзүн таштап сала жаздаган. Бирок онкологияны иликтөөгө каражат табуу үчүн белин бекем бууп, сулуулар сынагына катышып көрүүнү чечет.
"Мен баламды жоготуп алганда мындан ары бактылуу болбойм го деп ойлогом. Сынактарга катышкан сайын өзүмө ишене баштадым, дем-күч алдым", — деди ал.
60 жаштагы аял ар өлкөнүн 22 сулуусу менен ат салышкан. Алардын эң кичүүсү 26 гана жашта болчу. Робин жеңишке жетип, жашыл континенттин тарыхында эң улгайган сулуу деп аталып калды.
"Силердин жашооңордо эмне болгону маанилүү эмес. Баарын ишке ашырса болот. Жаш курак да эч нерсени чечпейт. Ал эми аялдын сулуулугу анын жүрөгү согуп турганда эч качан жоголбойт", — деди Кэннер.
Ал өзүнүн бул иш-аракеттери менен дүйнө жүзүндөгү кыйын учурга туш болгон аялдарга дем бергиси келгенин баса белгилеп кетти.