БИШКЕК, 8-июл. — Sputnik. Кыргызгидромет бир жумага карата өлкө аймагында күтүлгөн аба ырайынын божомолун таратты.
Маалыматка караганда, апта ичи тоолуу аймактарга гана жаан жаап, башка жерлерде күн ысык болот.
9-10-июлда көпчүлүк аймактарда күн ачык болуп, Ош, Жалал-Абад, Баткен, Чүй жана Талас облустарында абанын температурасы 40 градуска жетет. Нарын менен Ысык-Көлдө 31…36 градуска жогорулайт.
11-12-июль күндөрү күндүз тоолуу райондордо өткүн өтүп, күн күркүрөшү мүмкүн. Ош, Жалал-Абад, Баткен, Чүйдө абанын температурасы 34…39 градуска жетсе, Нарын менен Ысык-Көлдө 31…36 градус нөлдөн жогору болот. Ал эми Таласта 33…38 градус ысык болушу божомолдонууда.
13-14-июлда түнкүсүн жаан-чачын күтүлбөйт, күндүз тоолуу райондордо өткүн өтүп, күн күркүрөшү мүмкүн, дыйкачылык аймактарда жаан-чачын күтүлбөйт. Абанын температурасы дээрлик өзгөрүлбөйт.