БИШКЕК, 7-июл. — Sputnik. Түркиядан Нарын шаарындагы эс алуу жайын реконструкциялоо, облустагы университетинин алдында ветеринардык лаборатория, кыргыз-түрк факультетин курууга даярдык көрүү үчүн атайын делегация келди. Бул туурасында өкмөттүн Нарын дубаны боюнча өкүлчүлүгүнөн маалымдашты.
Делегация Түркиянын Кастамону облусунан аталган аймакка экинчи ирет келип отурат.
Кызматташуу чыйыры өткөн жылы салынган. Эки тараптуу алаканы, социалдык-экономикалык, маданий байланыштарды бекемдөө максатында өкмөттүн Нарын облусундагы өкүлү жана Түркиянын Кастамону облусунун администрация өкүлү келишимге кол койгон.
"Кызматташтык келишиминин негизинде Нарын калаасынын 150 жылдыгына карата алгачкы белек иретинде шаардагы "Алма бак" паркы калктын ар бир жарандын жаш өзгөчөлүгүнө жараша эс алууга бардык шарты менен реконструкцияланат. Мыйзамдуу жагы каралып, сейил бактын ичиндеги курулуучу объектилердин жайгашуусу такталган соң иш башталат " — деп кабарлады өкүлчүлүктүн маалымат кызматы.
Кийинки объект Сагын Нааматов атындагы Нарын мамлекеттик университети болду. Делагацияга Агрардык-техникалык факультетинин материалдык-техникалык базасы жана кыргыз-түрк факультетинин курулуш долбоору тааныштырылды.