БИШКЕК, 5-июл. — Sputnik. Чүй менен Ысык-Көл облустарында туристтик сезонго карата жол коопсуздугун камсыздоо жана кырсыктардын алын алуу максатында 34 пост коюлганын ИИМдин Жол кыймылы коопсуздугун камсыздоо башкы башкармалыгы билдирди.
Маалыматка ылайык, посттор "Достук" сыяктуу негизги туристтик каттамдарга коюлган.
Чүй облусу боюнча 15 көчмө пост иштеп жатат:
— Бишкек — Торугарт трассасынын 6-чакырымынан 66-чакырымына чейин төрт көчмө пост;
— Бишкек — Торугарт айланма авто трассасынын 1-чакырымынан 130-чакырымына чейин 11 көчмө пост;
Ысык-Көл облусунда дагы 15 көчмө пост бар. Алардын төртөө Балыкчы — Бөкөнбаев — Каракол авто жолуна коюлган:
— Бишкек — Торугарт трассасынын 129-203-чакырымына чейинки аралыгынан "Ак-Кеме" постуна чейин бир пост коюлган;
— Балыкчы — Ананьево — Каракол трассасынын 5-чакырымынан 216-чакырымына чейин 11 пост;
— Балыкчы — Бөкөнбаев — Каракол трассасынын 5-чакырымынан 216-чакырымына чейин төрт пост;
Коррупция менен күрөшүү максатында бардык инспекторлор видеожетондор менен камсыздалган.