БИШКЕК, 3-июл. — Sputnik. Социалдык тармактардын Кыргызстандагы сегментинде адамдын кескиленген дене мүчөлөрүнүн сүрөттөрү жайылып жатат. Аны адам этин жеген кытайлыктар тамак-ашка колдонот деген маалымат тарап кетти.
Сүрөт менен кошо кыргыз тилинде сүйлөгөн аудио жазылма дагы жайылууда. Автор адамдар кытайлык каннибалдардын курмандыгы болуп жатканын айтып өткөн. Ал ошондой эле бул кыргызстандыктар үчүн да коркунуч экенин белгилеген.
Социалдык тармактардын колдонуучулары буга ишене берген жок. Мунун да жөнү бар. Себеби ал сүрөттөр ачык ресурстардан алынган. Таиланддык скульптор Киттивата Унарром адамдын дене мүчөлөрүнө окшоштуруп таттууларды жасап келет.
Бул боюнча Культурология сайтына дагы маалымдалган. Автор токочтордун даамы укмуш экенин, бирок аны таттууну чыныгы сүйгөн адамдар гана ооз тийүүгө даай турганын белгилеген.