БИШКЕК, 1-июл. — Sputnik. Футбол боюнча дүйнө чемпионатынын чейрек финалы үчүн ат салышкан Россия менен Испания курама командаларынын беттеши аяктап, Россия жеңишке жетти.
Оюн курч мүнөздө өттү. Эки таймдын жыйынтыгы менен беттеш 1:1 эсеби менен аяктап, алгачкы топ автоголдун негизинде Россиянын дарбазасына кирсе, кайра пенальти менен орустар эсепти теңдей алды.
Мындан улам чемпионат өтүп жаткан жарым айдан бери биринчи ирет кошумча убакыт берилди. Испандар техникалык чеберчилиги жогору экенин көрсөтүп, көбүнесе чабуул жасаса, россиялык команданын коргонуусу мыкты болду.
Натыйжада овертайм да тагдыр чече алган жок. Кезек пенальтилер сериясына берилди. 11 метр алыстыктан туруп топ тебүү 4:3 эсеби менен аяктап, Россия чейрек финалга чыкты. Оюн талаасынын ээси болгон россиялык команданын дарбазачысы Игорь Акинфеев эки ирет атаандаштын тобун тосуп калууга үлгүрдү.