БИШКЕК, 1-июл. — Sputnik. Кыргызгидромет бир жумага карата өлкө аймагында күтүлгөн аба ырайынын божомолун таратты.
Маалыматка караганда, апта ичи күн күркүрөп, жамгыр жааганы менен көпчүлүк аймактарда абанын температурасы жогору болот.
2-июль күнү тоо этектеринде жана тоолуу райондордо өткүн өтүп, өрөөндөрдө жаан-чачын күтүлбөйт. Абанын температурасы Чүй өрөөнүндө 29…34, Таласта 27…32, Ош, Жалал-Абад жана Баткенде 25…30, Ысык-Көл менен Нарында 21…26 градус ысык болот.
3-4-июлда мезгил-мезгили менен жаан жаап, күн күркүрөп, батыштан соккон шамалдын ылдамдыгы 15-20 метрге чейин жетет. Абанын температурасы Ош, Жалал-Абад, Баткен аймактарында 28…33, Чүйдө 25…30, Таласта 23…28 градус ысык болушу болжолдонууда. Нарын менен Ысык-Көл облусунда 21…26 градус нөлдөн жогору болот.
5-июлда жаан-чачын күтүлбөйт. Абанын температурасы көпчүлүк аймактарда жогорулайт.