БИШКЕК, 1-июл. — Sputnik. Дүйнө жүзүндө диабет оорусунан жабыркагандардын саны көбөйүп жатышы бир гана семирүүдөн эмес, абанын булганып жатышынан да улам болушу мүмкүндүгү Lancet Planetary Health First журналына жарыяланган макалада айтылат.
Окумуштуулар абасы кир болгон чоң шаарларда диабет оорусу менен жабыркагандар улам көбөйүп жатканын белгилешет. Киши үчүн коркунучтуу эмес деп Дүйнөлүк саламаттык сактоо уюму белгилеген абанын кири боюнча норманын минималдык көрсөткүчүндө да диабет оорусу өрчүгөнү байкалган. Андыктан бул нормаларды өзгөртүү учурдун талабы экени макалада айтылат.
Акыркы маалыматтар боюнча дүйнө боюнча учурда 420 миллион киши диабет оорусунан жабыркайт. Бул көрсөткүч АКШда 30 миллион болсо, Россияда 13 миллиондой.
Ал ортодо Кытайдын окумуштуулары диабет оорусу өмүрдүн узактыгына кандай таасир берерин изилдеп, бул дарт менен жабыркагандар 10 жылдай кыска жашай турганын аныкташкан. Америкада болсо каза болгондордун 12 пайызы диабет менен оорушарын адистер эсептеп чыккан.