БИШКЕК, 29-июн. — Sputnik. Чүй облусунун Суусамыр өрөөнүнүн Кожомкул айылынын Мырзакматов атындагы орто мектебинде 11-класска көчкөн төрт окуучунун ата-энеси балдарын бир жыл өз айылынан эле окутууну суранууда. Бул тууралуу Sputnik Кыргызстан агенттигине ата-энелер комитетинин төрайымы Назгүл Абдыгулова билдирди.
Анын айтымында, аталган айылда быйыл 10-классты алты гана окуучу аяктап, анын экөө турмуш шартына байланыштуу IV чейрекке жетпей окуусун таштап салган.
"Мектепте жалпы 182 бала билим алат. Окуучулардын көбү 9-классты бүткөндө эле же башка окууга тапшырып, же чыгып кетет. Эки бала 11-класска көчпөй окуудан чыгып кетип, азыр төрт эле окуучу калды. Мектеп жетекчилиги "башка жактан орун карай бергиле" деп кетиптир. Төрт өспүрүм тең эркек балдар. Биринин ата-энеси майып болсо, кээси үйдүн кичүүсү. Коңшу айылга барып окусун десе жол алыс, кыштын күнү бат эле караңгы кирип кооптуу болуп калат экен. Анын үстүнө булар окууну таштап салса, ата-энелери жаман жолго түшүп кетет деп коркууда. Ошондуктан Билим берүү министрлигинен балдарды айылдан эле окутууну суранып жатышат", — деди Абдыгулова.
Жайыл району боюнча билим берүү бөлүмүнүн башчысы Алик Гасанов бул маселе боюнча Кожомкул айылына 5-июлда бара турганын билдирди.
Гасанов бул акыркы чечим эместигин айтып, барганда ата-энелер менен көзмө-көз сүйлөшүп, кеңешип, бир чечим кабыл алынарын кошумчалады.