БИШКЕК, 28-июн. — Sputnik. Сокулук РИИББинин убактылуу кармоочу жайына тоок грилдин ичине баңгизатын катып кирүүгө аракет жасалды. Бул тууралуу Чүй ОИИББден кабарлашты.
Милициянын маалыматына караганда, 5-июнь күнү кечке жуук РИИБдин имаратынын жанындагы унааны текшерүү учурунда баңгизаты табылган. Анын айдоочусу менен жүргүнчүсү убактылуу кармоочу жайдагы таанышына келгени аныкталган.
"Милиционерлер камакта отургандар үчүн алып келинген тоок грилди текшергенде ичинен пакетке салынган 13 грамм кара куурай менен 2 грамм героин табылды", — деп айтылат маалыматта.
Аталган факты боюнча Кылмыш жаза кодексинин 246-беренси (мыйзамсыз негизде баңгизатын алуу, сатуу, жөнөтүү) боюнча кылмыш иши козголду.