Бишкек шаарынын борбордук бөлүгүндө (Тоголок Молдо, 50 көчөсү) жайгашып, белгилүү скульптор Тургунбай Садыковдун атын алып жүргөн илимий-методикалык музей кыргыз тарыхына атын алтын тамга менен жаздырган улуу инсандардын эстелик жана бюсттарына толгон. Музейге баш баккан киши буга чейин китептен окуп, сүрөттөрдөн гана таанып-билген залкар адамдарды жакындан көрүү мүмкүнчүлүгүнө ээ болот. Эмгектердин баары кыргыз скульптурасынын башатында турган Тургунбай Садыковго таандык. Музей 2015-жылы улуу таланттын 80 жылдыгына карата ачылган.
Бир ааламдын бөлүгү
Музей бүт өлкөгө жайылган көркөм өнөр системасынын бир бөлүгү экендигин бул жерде илимий кызматкер катары эмгектенген Дария Кайбылдаева баса белгиледи.
"Бул музей скульптор Тургунбай Садыков негиздеген чоң бир системанын бөлүгү. Ага Кыргызстандын алыскы аймактарындагы көркөм өнөр мектептери, колледждер, аспирантурага ылайыкташкан окуу жайлары кирет. Ал эми системанын эң жогорку чеги Улуттук көркөм өнөр академиясы болуп эсептелет. Тургунбай Садыков жеке өзү аймактарды кыдырып, таланттуу жаштарды таап, алардын өнөр өркүндөтүүсүнө, бул жаатта билим алуусуна шарт түзөт. Өз жолун өнөрдөн тапкандар мектептен баштап академияга чейин билим алышат. Бул музей да кыргыз жарандарынын, айрыкча жаш муундардын өз тарыхын, улуу инсандарын унутпасын, аларды жакындан таанысын деген негизде Садыковдун демилгеси менен ачылган", — деди ал.
Дыйкандан баштап ажого чейин
Кайбылдаеванын айтымында, музейдеги 12 бөлмөнүн баарында жана коридорлордо ар кандай тармакта ишмердигин жүргүзгөн улуу инсандарыбыздын эстеликтери жана бюсттары жайгашкан. Кыргыз саясатында өчпөс орду бар Ишенбай Абдуразаков, Исхак Раззаков, тышкы иштер жана маданият министри Күлүйпа Кондучалова, мурдагы ажо Аскар Акаевдин, акындар Тоголок Молдо, Барпы Алыкулов, Жеңижок, Калык Акиев, Токтогул Сатылганов, Эстебес Турсуналиевдин, жазуучулар Чыңгыз Айтматов, Аалы Токомбаев, Түгөлбай Сыдыкбековдун, сахна адамдары Муратбек Рыскулов, Бүбүсара Бейшеналиева, Кайыргүл Сартбаеванын, комузчу Карамолдо Орозовдун, композитор Калый Молдобасановдун, сүрөтчү Гапар Айтиевдин эстеликтери алардын кичинекей бир бөлүгү гана. Аны менен бирге Тургунбай Садыков эмгектеринде ар дайым күжүрмөн эмгекчилерди даңазалап келген.
"Эмгек баатыры Зууракан Кайназарова баш болгон бир топ карапайым дыйкан, малчы жана усталардын да эстеликтери улуу инсандардын катарында татыктуу ордун ээлеп турат. Бул жерге көптөгөн кишилер келет. Алардын көпчүлүгүн студент жана мектеп окуучулары түзөт. Алардын агайдын эмгектерин таң калуу жана сүйүнүү менен көрүшкөнү бизди кубандырат", — деди Кайбылдаева.
Скультордун алгачкы эмгектери
Музейде скульптордун "Жылкычы", "Балыкчы" жана "Койчу" сыяктуу алгачкы эмгектери да орун алган. Тургунбай Садыков апасынан эрте айрылгандыктан, анын чыгармачылыгында эненин орду өзгөчө орунду ээлейт. Андыктан ар бир бөлмөдө жайгашкан түрдүү образдардагы "Эне" скульптурасы башка эмгектерге көз салып, алардын колдоп тургандай элес калтырат.
Дария Кайбылдаеванын айтымында, музейде азыркы учурда ремонт жүрүүдө. Оңдоп-түзөө иштери аяктап, музей баштан аяк жаңыланат. Көпчүлүгү жарым кылым мурда жасалган эстеликтер күн сайын тазаланып турат. Экспонаттар гипс, коло, жез жана жыгачтан жасалган.
Музейдин эшиги дүйшөмбүдөн жума күнүнө чейин ачык. Ал эми кирүү акысыз.