БИШКЕК, 28-июн. — Sputnik. Футбол боюнча дүйнө чемпионатында бүгүн "Н" тайпасындагы төрт команда бири-бири менен беттешти.
Сенегал менен Колумби "Самара Арена" стадионда кездешип, биринчи таймда командалардын бирөө дагы эсепти ача алган жок. Ошентсе да оюн учурунда гол кирип кете турчу кооптуу учурлар болду. Биринчи тайм аяктагандан кийин кошумча 3 мүнөт кошуп берилди.
Колумбиялык оюнчу Ерри Мина өз командасын 74-мүнөттө алдыга сууруп чыкты. Анын тепкен тобун сенегалдык дарбазачы тосо албай калды.
Экинчи таймдын негизги убактысына 4 мүнөт кошуп берилгенине карабай эсеп өзгөргөн жок.
Ал эми Япония менен Польша "Волгоград Арена" стадионунда күч сынашты. Япониялыктар менен польшалыктар да кызыктуу оюн көрсөттү. Оюнчулар эсепти ачуу үчүн аракет кылганы менен биринчи таймда андан майнап чыккан жок. Замбиялык рефери Женни Сиказве биринчи тайм аяктагандан кийин негизги убакытка бир мүнөт кошуп берди.
Экинчи тайм башталганда польшалык футболчу Ян Беднаректин таамай тепкен тобу (59-мүнөт) атаандашынын дарбазасына кирип, командасын алдына сууруп чыкты.
Экинчи таймдын негизги убатысына болгону 3 гана мүнөт кошуп берилди. Бирок ал эч кандай чечүүчү роль ойногон жок.
Ошентип "Н" тайпасында Колумбия биринчи, Япония экинчи орунду ээлеп плей-офф оюндарына чыкты. Упайларды эсептей келгенде Япония менен Сенегал тең чыкты. Плей-офф оюндарына жолдомо алыш үчүн командалардын кимиси азырак сары карточка алганы эсепке алынды. Жыйынтыгында япон оюнчулары аз эскертүү алгандыктан оюндарды улантууга жолдомо алды.
Сенегал менен Польша ушуну менен футбол боюнча чемпионаттагы оюндарына чекит койду.