БИШКЕК, 26-июн. — Sputnik. Абитуриенттерди жогорку окуу жайларга кабыл алуу жана тандоо туру 9-июлда башталат. Бул тууралуу Билим берүү жана илим министрлигин маалымат кызматы кабарлады.
Министрлик ошондой эле жалпы республикалык тестирлөөнүн жыйынтыгы боюнча 2018-2019-окуу жылына абитуриенттерди кабыл алуу жана тандоо турларынын графигин жарыялады.
Анда жазылгандай биринчи тур 9-июлдан 14-июлга чейин уланса, экинчи тур 16-июлдан 21-июлга чейин созулат. Үчүнчү тур Билим берүү жана илим министрлигинин макулдугу менен өткөрүлүп, 23-июлдан 28-июлга чейин уланмакчы.
25-августка чейин абитуриенттердин тизмеси такталып, тастыктоо иштери жүрөт.
Бүтүрүүчүлөргө жана ата-энесине жардам иретинде Sputnik Кыргызстан агенттиги өлкөдөгү бардык окуу жайлардын дарек, телефондорун чогултуп койгон.