БИШКЕК, 26-июн. — Sputnik. Жалал-Абад облусунда дүйшөмбү күнү болгон жол кырсыктарынан баш-аягы 16 киши жабыркаганын ӨКМ билдирди.
Биринчиси Чычкан капчыгайында саат 19.30дар чамасында болгон. Алты кишиси менен келе жаткан Honda Fit жолдон чыгып кетип, бир капталына оодарылып калган. Жабырлануучулардын баарын жолдон өтүп бараткан машиналар жакын жердеги ооруканага жеткиришкен.
Экинчи кырсык Кара-Көл шаарынан анча алыс эмес Сары-Булак тилкесинде болгон. Volkswagen Passat менен Mazda 626 кагышып, эки айдоочу, ичиндеги сегиз киши тең жаракат алган. Аларды да бейтааныш адамдар ооруканага алпарган.