БИШКЕК, 26-июн. — Sputnik. Кыргызстандык үч окуучу Өзбекстандын Самарканд шаарында өткөн Мирзо Улугбек атындагы эл аралык олимпиададан үч медаль утушту. Бул туурасында коңшу өлкөнүн Элдик билим берүү министрлигинин сайтында маалымдалат.
Аталган олимпиада астрономия жана физика сабактары боюнча 19-23-июнь күндөрү болуп өттү. Анда Кыргызстан, Өзбекстан, Казакстан, Россия, Белоруссия, Япония жана Түркмөнстандан барган 10-11-класстын 45 окуучусу күч сынашкан.
Астрономиядан Бишкектеги №61 Автордук физика-математикалык мектеп-лицейи окуу комплексинин 11-классынын бүтүрүүчүсү Ырыскелди Анарбеков алтын медалга ээ болгон.
Олимпиада өзбекстандык белгилүү окумуштуу Мирзо Улугбектин атынан негизделип, быйыл биринчи жолу өтүп жатат. Бул президент Шавкат Мирзиёевдин демилгеси менен уюштуруулуда. Мындан ары 10-11-класстар арасында ар эки жыл сайын өтүп турмакчы. Алдыңкы орунду ээлегендерге медаль жана атайын белектерден сырткары, Өзбекстандын жогорку окуу жайларында окууга жеңилдиктер берилет.