БИШКЕК, 21-июн. — Sputnik. Ош облусунун Кара-Суу районунда 42 жаштагы үй ээсин өлтүрүүгө шектелип анын уулу менен өмүрлүк жары кармалганын облустук милиция билдирди.
Маалыматка ылайык, үй-бүлө Кашкар-Кыштак айыл аймагына караштуу Вахим айылында турган. Алдын ала иликтөөнүн жүрүшүндө каргашалуу окуяга жубайлардын ортосундагы пикир келишпестик негиз болгон.
"Маркум 53 миң сомдук унаа сатып алып, карызынан кутулуу үчүн насыя алууну чечет. Бирок ага 37 жаштагы аялы каршы чыгат. Талаш-тартыш менен акыры кредит алынат. Бирок ай сайын төлөө мөөнөтү келгенде кыйынчылыктар жаралып, үй ээси жашап турган тамын сатууну чечет. Мунун айынан үйдө дээрлик сегиз ай бою уланган уруш чыгат", — деп айтылат билдирүүдө.
Милиция талаш-тартыш мушташка чейин жеткенин белгилейт.
Андан соң катты бир туугандарына көрсөтүшөт. Маркумдун бир тууган агасы инисинин колу эмес экенин билип, 17-июнга караган түнү анын үйүнө келген. Ошол маалда келини кан болгон жууркандарды өрттөп жаткан болот. Дароо аны өчүрүп, кайнагасы милиция кызматкерлерин чакырган.
Тартип сакчылары үйдүн огородунан маркумдун сөөгүн таап чыгып, уулу менен аялын шектүү катары кармашкан.
Факты боюнча Кылмыш жаза кодексинин 97-беренесинин (Адам өлтүрүү) негизинде кылмыш иши козголуп, эне-бала эки айга камакка алынды.