Чаткал районунун Шекафтар айылында жүргөн селдин ички чарбалык жолдорду жууп, үйлөрдүн айланасындагы тилкелерди каптап кеткени тартылган видеону Sputnik Кыргызстан агенттигине окуянын күбөсү жиберген.
ӨКМдин маалыматы боюнча сел 21-июндагы нөшөрлүү жаандан кийин жүрүп, трассанын төрт метрин алып кеткен. Мындан улам жол убактылуу жабылган.
Мындан тышкары, Жунус айылынын бир жашоочусунун сарайын каптап, Кызыл-Корго айылындагы жолдун 10 метрлик аралыгы менен көпүрөнүн бир бөлүгүн жууп кеткен.
Кырсыктын кесепеттерин ӨКМдин кызматкерлери жана жергиликтүү бийликтин өкүлдөрү жоюуда. Ушу тапта жол ачылган.