БИШКЕК, 19-июн. — Sputnik. Кыргызстандын атайын кызматтары жүргүзгөн операциялар тууралуу Террорчулукка каршы борборунун директору, Улуттук коопсуздук боюнча мамелкеттик комитеттин жетекчи орун басары Асылбек Кожобеков ЕАЭБ өлкөлөрү катышып жаткан террорчулукка каршы форумда айтып берди.
Анын пикиринде ушу тапта "Ислам мамлекетинин" бир бөлүгү болгон "Вилаят Хорасан" уюмунун Афганистанда өз позициясын бекемдеп жатышы өзгөчө кооптуулук жаратууда. Бүгүнкү күндө террордук уюмдардын лагерлеринде согушкерлерди жалгыздап согушууга даярдап, жардыруучу түзүлүш менен иштөө үйрөтүлүп, унаа айдоо ыкмалары иштелип чыгып жатканы айтылып келет.
"УКМК террорчулукка каршы күрөшүп жатат. Атайын тапшырма менен Кыргызстанга келген 11 согушкер кармалды", — деди Кожобеков.
"Ал жакта кылмышкерлер 9-май күнү "Өлбөс полкко" чабуул жасамак. Андан сырткары, Жаңы жылды майрамдоо учурунда Москва менен Санкт-Петербургда метродогу жардырууну алдын алдык", — деди адис.
Кожобеков өлкөдө аскердик-патриоттук клубдарды түзүү муктаждыгы жаралганына токтолду.