БИШКЕК, 19-июн. — Sputnik. Учурда Ат-Башы районуна караштуу Арпа жайлоосунун Чырмаш тилкесинде 500 баш майда жандык, 70 жылкы, ири мүйүздүү алты мал жана төрт ит кутурма оорусуна каршы эмделгенин ӨКМ билдирди.
Эскерте кетсек, 16-май күнү аталган тилкеде Жумаев аттуу тургундун койлоруна карышкыр тийген. Мал ээси бул тууралуу жана ал эч кимге билдирген эмес. 11-июнда Жумаевдин 50 баш кой-козусу өлгөндөн кийин ал райондук ветеринардык жана фитосанитардык коопсуздук боюнча башкармалыгына бир козунун тарпын жиберген. Республикалык ветеринардык лабораториясынын вирусология бөлүмүнүн жыйынтыгы боюнча 13-июнда кутурма оорусу аныкталган.
Чабандын үйүндөгү адамдар да ооруканага кайрылып, эки киши жаткырылганы айтылган.
Окуя болгон жерге райондук санитардык-эпидемиологиялык көзөмөлдөө борборунан жана ветеринардык башкармалыктан беш кызматкер тартылып, малга эмдөө жүргүзүлдү.
Ал эми ооруканада дарыланып жаткан эки киши 18-июнь күнү үйлөрүнө чыгарылган.