БИШКЕК, 13-июн. — Sputnik. Бишкек шаарынын ички иштер башкы башкармалыгынын өздүк курамы толугу менен күчөтүлгөн тартипте кызмат өтөөгө өттү. Бул тууралуу ШИИБ билдирди.
Маалыматка ылайык, мындай кадам Орозо айттан улам жасалууда. Коомдук тартипке 15-июнь күнү 1,5 миңден ашуун милиция кызматкери көз салат.
Мындан тышкары, Айт намазга карата эски аянттын айланасындагы көчөлөргө жол кыймылы үчүн убактылуу чектөө киргизмекчи:
— Чүй проспектиси, Абдрахманов көчөсүнөн Тоголок Молдого чейин;
— Абдымомунов көчөсү, Абдрахмановдон Тоголок Молдого чейин;
— Фрунзе көчөсү, Абдрахманов көчөсүнөн Тоголок Молдого чейин;
— Тыныстанов көчөсү, Фрунзеден Абдымомуновго чейин;
— Эркиндик бульвары, Фрунзеден Абдымомуновго чейин;
— Логвиненко көчөсү, Чүй проспектисинен Киев көчөсүнө чейин.
Шаардык милиция Айт намаз учурунда көлөмдүү, учтуу буюмдарды, курал-жарак, салют, фейерверктерди алып өтүүгө тыюу салынарын эскертет.