Бул ирет бокс боюнча профессионалдар арасында дүйнөнүн жети жолку чемпиону, СССРдин эмгек сиңирген спорт чебери, КРдин Бокс федерациясынын вице-президенти Орзубек Назаров чеберчилигин көрсөтүп берди.
Назаров муштумдун жөнөкөй соккусунан тарта дүйнөнүн мен-мен деген мушкерлерин боорго согуп боортоктоткон башкы ыкмасына чейин көрсөттү.
"Сокконду үйрөнүү үчүн кол күчтүү болушу керек. Бул үчүн жөнөкөй көнүгүүлөр жасалат. Таамай согуш үчүн бүгүлгөн колдун эки манжасынын сөөгү узатылып, үчүнчүсү жардамчы кызматты аткарат. Алдыңкы кол мүшөккө тийгенде, экинчи кол ээке такалат. Жамбаш узатылган кол менен бирге кыймылга келет. Бул бокстун негизги ыкмалары. Эгер менин рингдеги башкы ыкмамды айта турган болсом, оң колум менен атаандаштын денесинин бардык бөлүгүнө сокку узата берчүмүн, бир гана сол кол менен боорго сокчумун. Ал бир караганда капталдан же астыдан узатылган соккуга окшош", — деди боксчу мастер-классында.
Бирок Орзубек Назаров мындай ыкмалар көчөдө эмес, спорттук мелдештерде колдонулушу керек экендигин баса белгиледи.