БИШКЕК, 7-июн. — Sputnik. Кыргызстандын Саламаттык сактоо министрлиги аялдар майып балдарды төрөбөшү үчүн түшүндүрүү иштерин жүргүзүүсү керек. Бул тууралуу Жогорку Кеңештин жыйынында КСДП фракциясынан депутат Ирина Карамушкина билдирди.
Эл өкүлү мындай оюн "ден соолугу боюнча мүмкүнчүлүгү чектелген балдарды караган тараптарга каражат төлөө" жөнүндөгү мыйзам долбоор каралып жаткан учурда айткан.
"Биздин аялдар майып балдарды төрөп алып, өмүр бою кыйналбашы үчүн Саламаттык сактоо министрлиги алдын ала түшүндүрүү иштерин жүргүзүү үчүн көбүрөөк каражат бөлсө майнап чыгаар. Мен муну эмнеге айтып жатам? Көпчүлүк учурда аялдар баласы менен жалгыз калып калат. Башка өлкөлөрдө кандай экенин билбейм, бирок биздин эркектер майып бала төрөгөн аялдарын таштап кетет", — деди Карамушкина.
Ал ошондой эле коррупционерлерден өндүрүлгөн каражаты ден соолугу боюнча мүмкүнчүлүгү чектелген балдарга бөлүү керектигин кошумчалады.