БИШКЕК, 4-июн. — Sputnik. Таиланддын түштүк тарабында 80 желим баштыкты жутуп алган дельфинди өмүрүн сактап калууга мүмкүн болгон жок. Бул туурасында The Independent басылмасы жазды.
Аны өлүмдөн куткарып калабыз деген адистер беш желим пакетти оозунан сууруп чыгууга аракет кылган. Баш-аягы сегиз килограммга жакын пластик баштык суу жаныбарынын тамагы менен ашказанына туруп калган. Анын кесепетинен же тамак жей албай же таштандыны андан ары жута албай, кыйналган.
Биолог-океанограф Тон Тамронгнавасават жаныбар пластик баштыкты жутуп алгандан кийин тамак жей албай каларын айтты.
"Эгерде ашказаныңызга мындай 80 баштык кирип кетсе, өлдүм деп эле эсептей бериңиз", — деген ал.
Кытай, Индонезия, Филиппиндер, Вьетнам жана Таиланд — айлана-чөйрөнү, экологияны пластик таштандылар менен булгаган дүйнөдөгү эң ири беш мамлекет деп табылган.
Адистердин айтымына караганда, эгерде кандайдыр бир чаралар кабыл алынбаса, жакынкы он жылдын аралыгында дүйнөдөгү океандарда пластик таштандылар үч эсеген көп болот.
Кара дельфинде, илимде гринды деп аталган деңиз жаныбарларынун узундугу сегиз метрден узунураак болуп, салмагы үч тоннага чукулдап барат. Булардын мүнөзү жумшак, топ-тобу менен жашап, алыс аралыкка чейин сүзүп жүрүшөт.