Бүтүрүү кечесин мектепти аяктап жаткандар үйдө ата-энеси, бир туугандары менен деле белгилесе болот. Бул тууралуу Гүлшан Абдылдаева Sputnik Кыргызстан радиосунун таңкы эфиринде маек куруп жатып билдирди.
Анын айтымында, мектепти аяктадык деп сөзсүз эле кафеге олтуруу туура эмес.
"Айрым кыздар эмнеге тиги кыздын жакшы кийими бар, ал эми мени эмнеге жакшынакай кийиндире албайсыңар деп ата-энелерине нааразы болуп келет. Бүтүрүү кечеси үчүн окуучу кыздар үч көйнөк, туфли, аксессуар, макияж жана чач жасалгасына бир топ чыгым коротууга туура келет. Мындан сырткары, ар кандай терс иштер да бүтүрүүчүлөр арасында дал ушул күнү болот. Бул себептен мектептерге бүтүрүү кечесин өткөрүүгө тыюу салып келебиз", — деди Абдылдаева.
Адис мектепти бүтүрүп жаткандар үйдө ата-энеси, бир туугандары менен 11-классты аяктагандыгын белгилесе болорун кошумчалады.