БИШКЕК, 29-май — Sputnik. Бул жылы Кыргызстан биринчи жолу "Аалам сулуусу — 2018" дүйнөлүк сулуулар сынагына катышат. Бул тууралуу Pageanthology 101 басылмасы кабарлады.
Сынак сулууларды тандоодо абройлуу деп эсептелип, "Дүйнө сулуусу", "Жер сулуусу" сыяктуу сынактар менен бир катарда турат.
Ага өлкө атынан "Кыргызстан сулуусу — 2017" титулунун ээси, модель Бегимай Карыбекова катышмай болду.
Маалыматты Sputnik Кыргызстан агенттигинин кабарчысына Карыбекова тастыктап берди.
"1952-жылдан бери өткөрүлүп келе жаткан сынакка Кыргызстан биринчи жолу катышканы турат. Мага ишеним артылганы үчүн абдан кубанып жатам", — деди кыргызстандык сулуу.
Анын айтымында, сынакка даярдык башталып, учурда өзүн-өзү тааныштырууга фотосессия жүрүп жатат.
Былтыр бул иш-чара ноябрь айынын соңунда 86 сулуунун катышуусунда АКШнын Лас-Вегас шаарында өткөрүлгөн.
Бегимай Карыбекова "Кыргызстан сулуусу — 2017" улуттук сынагын жеңгенден кийин "Дүйнө сулуусу — 2017" сулуулар конкурсуна жолдомо алган. Бирок Кытайдын Бишкектеги элчилиги виза берүүдөн баш тарткандыгына байланыштуу ал жакка бара албай калган. Кыргызстандык сулуунун былтыркы "Дүйнө сулуусу —2017" сынагына даярдаган видеосун шилтеме аркылуу кирип көрө аласыздар.