БИШКЕК, 30-май — Sputnik. Москвада иштеп жүргөн кыргызстандык активисттер жарамазан айтып чогулган каражатты кайрымдуулукка жумшады. Бул туурасында Sputnik Кыргызстан агенттигине KG-ROSS коомунун мүчөсү Толкунбай Акматов билдирди.
Анын айтымында, жарамазандан чогулган акча дарылануусуна көп каражат талап кылынган кыргызстандык үч бейтапка берилет.
"Кечээ, 29-майда 15ге чукул киши Москвадагы кыргыздар иштеген кафе, чайкана, медициналык борбор жана башка мекемелерди кыдырып жарамазан айттык. Дагы көбүнө бара албай калдык. Мекендештерибиз жакшы кабыл алып колунан келишинче акчасын берип жатышты. Натыйжада, 52 100 рубль чогулду. Бул акча боорун алмаштыруу үчүн жардам сураган бир кыз менен келинге жана көзүнө операция жасалып жаткан наристеге бөлүнүп берилет. Муну аз болсо да муктаждарга жардам көрсөтүү үчүн уюштурдук", — деди Акматов.
Эскерте кетсек, былтыр да орозо айында ушул сыяктуу кайрымдуулук жарамазанын айтышып, андан түшкөн каржататты мээ рагына кабылган өспүрүмгө беришкен.
Орозо айында ооз бекитүү (имсак) жана ооз ачуу (ифтар) убактысын 2018-жылдын орозо календарынан караңыздар>>