БИШКЕК, 22-май — Sputnik. Эл ташыган Airbus A330 Мединадан Бангладештин борборуна учуп бара жатып, орто жолго конууга аргасыз болгон. Бул туурасында РИА Новости Asharq Al-Awsat басылмасына таянып кабарлады.
Абдель Рахман ат-Тейиб деп аталган эл ташыган компаниянын өкүлүнүн айтымында, учак абага көтөрүлгөндөн кийин эле анын капитаны алдыңкы дөңгөлөк иштебей жаткандыгын айткан. Аба кемесинде ал күнү 141 жүргүнчү жана экипаждын 10 мүчөсү болгон.
Учакты ошентип орто жолдон кондуруу чечими кабыл алынат да, Жидда шаарындагы аба майданына багыт алган. Жыйынтыгында учкучтар бир нече ирет аракет кылып жатып ири аба кемесин жерге дөңгөлөгү жок кондурган. Жерге сүрүлүп барып, анан чайпала токтогон Airbus A330дун алдынан жалын чыгып жаткандыгын көрүүгө болот. Учак толугу менен токтогон соң жүргүнчүлөр менен экипаж мүчөлөрүн аба толтурулган трап менен алып чыгышкан.
Буга чейин аскердин башынан болгону бир метр өйдөрөөк учуп өткөн учактын видеосу тараган.