БИШКЕК, 21-май — Sputnik. Мурдагы премьер-министр, КСДП партиясынын төрагасынын орун басары Сапар Исаков Кытайга 46 же 16 ирет эмес, төрт гана жолу барганын айтты. Бул тууралуу аталган партиянын маалымат кызматы кабарлады.
Буга чейин Жогорку Кеңеште ТЭЦтеги авария боюнча иш каралып жатканда, айрым депутаттар мурдагы өкмөт башчы Кытайга 16 жана 46 жолу учканын айтышкан. Алар Исаковдун Кытай менен кандайдыр бир байланышы болушу ыктымал деп күмөн санашкан.
Партиядан кабарлашкандай, бардык документтерди карап чыккандан кийин акыркы алты жылдан бери мурдагы премьер Кытайга төрт гана жолу барганы маалым болгон.
КСДП партиясы тарабынан берилген иш сапарлардын тизмеси:
Исаков 2012-жылы Пекинде өткөн ШКУнун өлкө башчыларынын саммитине барган;
2014-жылы мамлекеттик сапарынын алкагында Азия ишеним кызматташтыгы аттуу кеңешмеге катышкан;
Үчүнчү жолу, 2016-жылдын сентябрь айында экинчи дүйнөлүк согуштагы жеңиштин 70 жылдыгына карата Пекиндеги майрамдык иш-чарага катышуу үчүн барган;
Акыркы, төртүнчү жолкусу Кыргызстандын президентинин Кытайга болгон сапарынын алкагында ишке ашкан.
"Мен Кытайга расмий делегация менен барганым көрүнүп турбайбы. Ал эми ТЭЦ маселеси боюнча бул өлкөдө бир да жолу болгон эмесмин. Депутаттар башкалардан туура эмес угуп алып, эми элди эки анжы ойго алып келип жатат", — деп Исаков билдирген.
Ал ошондой эле эл өкүлдөрү мындай туура эмес маалыматтарды берип албаш үчүн жогорку трибунадан сүйлөөр алдында айтар сөзүн тактап алуусун суранган.