БИШКЕК, 18-май — Sputnik. Бишкекте айрым коомдук транспорттор “Абайлагыла, балдар!”, “Көңүл бургула, балдар!” деген эскертүү жарнактарын тагып жүрө башташты. Бул тууралуу шаар милициясынын ЖКККБсынын маалымат кызматы билдирди.
Плакаттар Бишкек шаарында 31-майга чейин өткөрүлө турган "Коомдук транспорт" рейдинин алкагында троллейбустар менен маршруткаларга илинген.
"Учурда 30 маршрутка жана 10 троллейбус ушундай жазуулары бар плакаттарды тагып жүрөт. Бирок эскертүүлөр дагы бир нече транспортко тагылат", — деп айтышты милициядан.
Маалыматка караганда, бул иш-чаранын негизги максаты — окуучулардын жол кырсыгына кабылуусун алдына алуу.