БИШКЕК, 17-май — Sputnik. Жогорку Кеңештин бүгүнкү жыйынында ТЭЦтин айланасында болгон окуяларды иликтеген депутаттык комиссиянын корутундусу талкууланып жаткан учурда Рыскелди Момбеков парламенттин трибунасына мурда кызматтан кеткен кишилерди чыгарып, аларды эксперт катары сүйлөтүп ыйык трибунаны булгабоо керектигин айтты.
"Булар эксперт боло турган болсо анда депутаттык комиссиянын эмне кереги бар? Биз бул жерде комиссиянын корутундусун талкуулашыбыз керек. Мындай болбойт, булардын бардыгы кызматтан алынган кишилер", — деди ал.
Өз кезегинде төрага Дастан Жумабеков суроо жаралганы үчүн тийиштүү кишилер жооп берүүсү керектигин айтып, Момбековго "туурасын сүйлөңүз" деп кайрылды.
Жумабеков Момбековду эмоцияга алдырбоого чакырып, парламентте каралып жаткан бардык иштер акыйкат чечиле турганын айтып, талкууну бурмалабоого чакырды.
Белгилей кетсек, Жогорку Кеңеште Бишкек ТЭЦтиндеги аварияны жана модернизациялоого кеткен каражаттын сарпталышын иликтеген депутаттык комиссиянын корутундусун кароо уланып жатат.