БИШКЕК, 16-май — Sputnik. Ысык-Көл облустук жол кыймылы коопсуздугун камсыздоо башкармалыгы (ЖКККБ) жол эрежелерин бузган унаалардын дөңгөлөктөрүн блоктой баштады. Бул тууралуу Ысык-Көл милициясынын маалымат кызматынан билдиришти.
Жол кыймылынын эрежелерин бузгандарга карата мындай чаралар Административдик жоопкерчилик тууралуу кодекстин 223 (Айдоочулардын транспорт каражаттарын пайдалануу эрежелерин бузуусу) жана 235-беренелери (Транспорт каражатын айдоочусунун жол белгилерин сактабагандыгы) негизинде колдонулууда.
"Бүгүнкү күндө облус боюнча дөңгөлөк блоктоочу жети каражат бар. Буга чейин аймак тургундарына ЖМК аркылуу жана эл менен жолугушуу маалында жол тартибин бузгандарга жогорудагыдай чаралар көрүлөрү эскертилген", — деп айтылат билдирүүдө.
Маалыматка караганда, ушул тапта облус боюнча 43 унаанын дөңгөлөгү блоктолуп, айдоочулар жоопко тартылды.