БИШКЕК, 14-май — Sputnik. Кыргызстандык Чолпон Мамбетова Таиландда өтө турган Miss Tourism Quenn International – 2018 эл аралык сулуулук конкурсуна өлкө атынан катышат. Бул тууралуу модель агенттиктеринин биринин директору Алтынай Исманкулова Sputnik Кыргызстан агенттигине билдирди.
Анын айтымында, конкурс 9-майда Районг провинциясында башталып, финалы 17-майда Бангкок шаарында болот.
Баш байге үчүн дүйнөнүн 60 мамлекетинен келген бийкеч ат салышат. Эң мыкты болгон кызга таажыдан тышкары акчалай да сыйлык ыйгарылат.
Кыргызстан бул конкурска 2013-жылдан тарта катышып келет. Буга чейин бул мелдешке Кыргызстандын атынан Айжамал Осмонова катышкан.
Мамбетова буга дейре Miss Tourism International – 2016 эл аралык сынагында өлкө намысын коргогон.