БИШКЕК, 7-май — Sputnik. Президент Сооронбай Жээнбеков Жеңиш күнүн утурлай Улуу Ата Мекендик согуштун ардагери, Социалисттик эмгектин баатыры Корчубек Акназаровго учурашып кайтканын өлкө башчынын маалымат кызматы билдирди.
Президент ардагерди келе жаткан майрамы менен куттуктап, жасаган кызматы үчүн ыраазычылык билдирди.
"Сиз сыяктуу адамдардын арты менен биз бүгүн Жеңиш күнүн белгилеп жатабыз. Сиздин муундун каармандыгы менен өлкөбүз согуштан кийинки кыйынчылыктарды жеңип чыкты. Майдандан жеңиш менен кайтып келип, Сиз өлкөбүз үчүн кайратмандык менен эмгектендиңиз", — деп баса белгиледи Жээнбеков.
Ал Улуу Ата Мекендик согуштагы Жеңиш адамзат тарыхында алтын тамгалар менен жазылып, кыргызстандыктардын эсинде түбөлүккө сакталып калганын белгиледи.
Президент ардагер аксакал менен дасторкон четинде маектешип, Улуу Ата Мекендик согуштун катышуучусу эмнеге муктаж экенине кызыкты. Маектешүү учурунда агрардык сектордун көйгөйлөрү, региондорду өнүктүрүү, өлкөдөгү азыркы коомдук-саясий кырдаал тууралуу сөз болду.
Ардагер аксакал кыргызстандыктарды биримдикте болууга, өлкөдөгү тынчтыкты жана ынтымакты көздүн карегиндей сактоого чакырып, мамлекет башчысына өзүнүн "Өмүрдөгү ак жол" аттуу китебин белекке берди.
Корчубек Акназаров 1-Белорусс фронтунда согушкан. Варшавага чейин жетип, Висла дарыясын кечип өтүү учурунда жарадар болгон. 1946-жылы майдандан туулган жерине кайтып келип, Чаткал районундагы К.Маркс атындагы мектепте окуу бөлүмүнүн башчысы болуп иштеген. Андан соң ал бүт өмүрүн партиялык ишке арнап, 30 жылдан ашуун Кыргызстан Компартиясынын Ак-Талаа, Жумгал жана Кочкор райондук комитеттеринин биринчи катчысы болуп эмгектенген.