БИШКЕК, 29-апр. — Sputnik. Борбор калаада, өкмөт үйүнүн алдында жана Эски аянтта ондон ашуун жаныбарлар менен ар кыл образдагы кишилердин өзгөчө өңдөгү скульптуралары — топиарий пайда болду.
Аларды бүгүн "Зеленхоз" Бишкек шаарынын 140 жылдыгына карата өкмөт үйүнүн алдына, Эски аянтка алып келген.
Жашыл айкелдердин арасынан буканы, керикти, акыраны, суунун үстүнөн секирип бараткан дельфиндерди, аюу менен мамалакты, кулжаны көрүүгө болот. Алардын сырткары кол чатыр көтөргөн аял, араба түрткөн кишинин элеси да орнотулган.
"Зеленхоз" ишканасынан учурда 15 скульптура бар экендигин жана алар аталган жерде эки күн турарын билдиришти.
Андан сырткары төрт жерге оюу түшүрүлгөн, гүлдөн жасалган төрт "килем" салынган. Аталган ишканадан килемдин жалпы аянты 400 чарчы метр экендигин кошумчалашты.
Эстеликтер буга чейин Нооруз майрамында "Жеңиш" аянтына орнотулган.