БИШКЕК, 24-апр. — Sputnik. Премьер-министр Мухаммедкалый Абылгазиев бүгүн күз-кыш мезгилинен өтүү жыйынтыктары боюнча кеңешме өткөрдү. Бул туурасында өкмөттүн маалымат кызматынан кабарлашты.
Өкмөт башчы бул жааттагы тийиштүү министрлик, ведомство жетекчилери келерки кышта шаардыктардын үйүн ысык суу жана жылуулук менен үзгүлтүксүз камсыздоосу үчүн Бишкек шаардык ЖЭБдеги таңкыстыктарды жоюу зарылдыгын айткан.
Бишкек шаардык ЖЭБдеги аварияны жоюу, өлкөнүн энергетикалык объектилериндеги мындай абалга жол бербөө боюнча кризиске каршы чаралардын комплексин иштеп чыгууну тапшырган.
Жыйында премьер-министр энергетика тармагына чынчыл, квалификациялуу адистер келиши керектигин белгилеген.
"Энергетикалык тармактын жетекчилери ишти ийне-жибине чейин билип, татаал кырдаалда жоопкерчиликти башка жакка шылтабай, өзүнө алууга үйрөнүүсү керек. Энергетикалык тармакка күз-кыш мезгилине даярдык көрүү жана андан өтүү боюнча коюлган милдеттенмелерди алып кете турган чынчыл, квалификациялуу адистер келиши керек. Узак мезгилден бери тутумдук коррупция энергетика тармагынын өнүгүүсүнө олуттуу тоскоолдук жаратып, натыйжада жагымсыз абалга алып келген", — деди ал.
Өкмөт башчы бул жаатта өзгөрүү жасоо мезгили келди деген оюн билдирген.