БИШКЕК, 22-апр. — Sputnik. Кыргыз-түрк "Манас" университетинде эл аралык балдар фестивалы өткөрүлүп жатат. Бул тууралуу иш-чаранын уюштуруучулары Sputnik Кыргызстан агенттигинин кабарчысына билдирди.
22-23-апрель күндөрүнө белгиленген фестиваль жыл сайын Түркия мамлекетинде өткөрүлүп келген балдар майрамына карата жана кыргыз-түрк достугун арттыруу үчүн уюштурулууда.
"Фестивалдын алкагында Туркия, Өзбекстан, Казакстандан келген бий топтору жана Кыргызстандын жети облусунан келген улан-кыздар өз өнөрлөрүн көрсөтөт. Жыйынтыгында жеңүүчүлөргө сыйлуу белектер жана чет өлкөлөрдөгү сынактарга катышып келүү мүмкүнчүлүгү берилет", — деп айтылат маалыматта.
Фестивалды Кыргыз-түрк "Манас" университети менен "ТМЖ" коомдук фондусу уюштуруп жатат.