БИШКЕК, 19-апр. — Sputnik. Жогорку Кеңештеги "Республика — Ата-Журт" фракциясы көпчүлүк коалицияга кирүү үчүн сүйлөшүүлөрдү жүргүзүп жатканын фракция лидери Жыргалбек Турускулов билдирди.
Анын айтымында, фракция мүчөлөрү эртең кезексиз жыйынга чогулат.
"Көпчүлүк коалицияга кирүү боюнча сүйлөшүүлөр болуп жатат. Фракция мүчөлөрү эртең кезексиз жыйынга чогулуп, чечим кабыл алабыз. Ошондой эле көпчүлүк коалициянын лидери Иса Өмүркуловго кат жөнөтөбүз", — деди ал.
Турускулов коалицияга кирүүдөгү башкы максат көпчүлүк коалицияны бекемдөө, өкмөттүн жаңы курамын түзүү экенин айтты.
Азыр көпчүлүк коалицияда КСДП, "Кыргызстан" жана "Бир Бол" фракциялары бар.
Эске салсак, Жогорку Кеңеш өкмөткө ишеним көрсөтпөгөндүктөн өлкө президенти Сооронбай Жээнбеков Сапар Исаков баштаган өкмөттү отставкага кетирүү боюнча Жарлыкка кол койгон.