БИШКЕК, 18-апр. — Sputnik. Telegram тиркемесине Россияда чектөө киргизилгенден кийин Google менен Amazon компаниялары аталган өлкөдө ишмердүүлүгүн улантар-улантпасын ойлонуп жатканын "Известия" басылмасы Роскомнадзордун башчысы Александр Жаровго шилтеме берип жазып чыкты.
Анын айтымына караганда, Amazon менен Google үчүн популярдуу тиркеменинин иштебей калышы олуттуу чакырык болуп эсептелет.
"Эки компания Россиянын аймагында ишин улантар-улантпасын талкуулап жатышы мүмкүн", — деди Жаров.
Ал ошол эле учурда аталган компаниялар Россиядан чыгып кетишине да бир аз күмөнү бар экенин кошумчалады.
Роскомнадзордун билдиришинче, мессенджердин жетекчилигинин аракеттери Россиянын кызыкчылыгына туура келбейт. Анткени Telegram аркылуу террордук уюмдар маалымат таратып жатканы айтылат.
Буга чейин Павел Дуров Telegram Роскомнадзордун шарттарын аткарбай турганын белгилеп, компания сөз эркиндиги жана жеке жашоого кол тийбестикти колдой турганын жар салган.
Ал эми 16-апрелден тарта Россия боюнча тиркемеге чектөө киргизүү иштери башталган.